Ráðstefna 11. júní 2005 - góðar undirtektir félagasamtaka

18.5.2005

Frestur fyrir félagasamtök að skrá sig til formlegrar þátttöku í ráðstefnu stjórnarskrárnefndar á Hótel Loftleiðum 11. júní næstkomandi rann út 15. maí s.l. Eftirtalin félög hafa óskað eftir því að taka til máls á ráðstefnunni og sum þeirra hafa þegar sent inn tillögur: Frjálshyggjufélagið, Hið íslenska félag áhugamanna um stjórnskipan, Landvernd, Mannréttindaskrifstofa Íslands, Mannvernd, Náttúruvaktin, Reykjavíkurakademían, Samband ungra sjálfstæðismanna, Samtök herstöðvaandstæðinga, Siðmennt, Skýrslutæknifélag Íslands, Undirbúningshópur kvenna um stjórnarskrárbreytingar, Þjóðarhreyfingin og Öryrkjabandalag Íslands.

Stjórnarskrárnefnd kemur saman til fundar 1. júní næstkomandi þar sem lögð verður lokahönd á dagskrá ráðstefnunnar. Verður dagskráin birt í byrjun júní og þar mun koma fram niðurröðun félagasamtaka í málstofur og ræðutími sem þau fá til umráða.Tekið skal fram að ráðstefnan sjálf er öllum opin á meðan húsrúm leyfir. Mælst er til þess að þátttakendur skrái sig ekki síðar en 3. júní næstkomandi. Rafræn skráning er möguleg á heimasíðu stjórnarskrárnefndar, www.stjornarskra.is.