Stjórnarskrárnefnd kynnir vinnuáætlun og opnar upplýsingabás í Þjóðarbókhlöðu

18.3.2005

Stjórnarskrárnefnd efndi til fréttamannafundar í Þjóðarbókhlöðunni 17. mars 2005 til að kynna nýsamþykkta vinnuáætlun og opna upplýsingabás.

Fram kom í máli Jóns Kristjánssonar, heilbrigðisráðherra, formanns nefndarinnar, að nefndin hvetti til víðtækrar umræðu í þjóðfélaginu um stjórnarskrána og breytingar á henni. Hyggst nefndin leggja sitt af mörkum til þess að sú umræða geti byggst á greinargóðum upplýsingum um starf nefndarinnar, íslenska stjórnskipun og stjórnarskrárþróun í nágrannalöndum.

Í þessu skyni var opnuð heimasíða á dögunum, stjórnarskrá.is þar sem birtar eru upplýsingar um starf stjórnarskrárnefndar, þar á meðal fundargerðir, erindi og bréf sem berast, hlekkir á helstu heimasíður sem máli skipta, og ýmislegt ítarefni sem til er á tölvutæku formi.

Sumt efni er að sjálfsögðu ekki til á tölvutæku formi, eins og bækur, greinar úr tímaritum og skýrslur af ýmsu tagi. Þess vegna er það nefndinni ánægjuefni að tilkynna að samkomulag hefur tekist við Landsbókasafn Íslands – Háskólabókasafn um að frátekinn verði á safninu bás undir efni sem tengist stjórnarskrárendurskoðuninni. Almenningi gefst þannig kostur á aðgangi að öllum helstu gögnum sem stjórnarskrárnefnd og sérfræðinganefnd, sem henni er til aðstoðar, byggja starf sitt á. Opnunartími er rúmur, því þessi hluti safnsins er opinn til klukkan 22 á kvöldin mánudaga til fimmtudaga og einnig hluta dags um helgar. Þeir sem eiga þess ekki kost að heimsæka Þjóðarbókhlöðuna geta nálgast þessi gögn með millisafnaláni.