Málstofa í stjórnskipunarrétti

Málstofa í stjórnskipunarrétti: Umboð og hlutverk þjóðkjörins forseta – írska og íslenska skipulagið.

Í tengslum við kennslu á námskeiðinu stjórnskipunarrétti í lagadeild Háskóla Íslands verður haldin málstofa föstudaginn 27. janúar nk. kl. 12.15-13.30 með yfirskriftinni: Umboð og hlutverk þjóðkjörins forseta – írska og
íslenska skipulagið.

Málshefjendur verða írski stjórnlagafræðingurinn Timothy Murphy lektor við Háskólann á Akureyri og Ólafur Þ. Harðarson prófessor við félagsvísindadeild Háskóla Íslands. Fundarstjóri er Björg Thorarensen prófessor við lagadeild HÍ.

Á málstofunni verður rætt um reglur um val þjóðkjörins forseta með sérstakri áherslu á írska stjórnskipulagið sem tryggir að meirihluti greiddra atkvæða sé að baki þeim frambjóðanda sem nær kjöri í forsetakosningum. Þá verður fjallað um valdheimildir forseta Írlands samkvæmt írsku stjórnarskránni og hvernig því valdi hefur verið beitt í framkvæmd. Samanburður verður gerður á írskum og íslenskum stjórnskipunarreglum hvað þetta varðar og fjallað um röksemdir með og á móti því að þjóðkjörinn forseti í lýðræðisþjóðfélagi taki ákvarðanir í umboði þjóðarinnar eða vísi málum til hennar.

Að loknum erindum málshefjenda verða fyrirspurnir og umræður. Málstofan verður haldin í stofu L-101 í Lögbergi og er opin öllum sem áhuga hafa á efninu.